منتدى الريس

بصراحة مش لاقية عنوان 110

انضم إلى المنتدى ، فالأمر سريع وسهل

منتدى الريس

بصراحة مش لاقية عنوان 110

منتدى الريس

هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
منتدى الريس

منتدى الريس المحبوب


5 مشترك

    بصراحة مش لاقية عنوان

    night moon
    night moon
    مشرفه بالاداره
    مشرفه بالاداره


    عدد المساهمات : 149
    تاريخ التسجيل : 05/02/2011
    العمر : 32
    المزاج الان : صمت

    m10 بصراحة مش لاقية عنوان

    مُساهمة من طرف night moon السبت 12 فبراير - 15:36

    بسمله 1

    اخوتى واحبتى فى الله - ازيكم
    يارب كلكم تكونو بخير

    انا اختكم نايت مون
    بصراحة فاض بيا الكيل بالظبط زى رئيسى
    ونفسى اتكلم وحد يسمعنى
    ياترى هتسمعونى ولا هتزهقو من القراءة وتخرجو من الموضوع ؟؟


    أولا..انا بأذن الله مهنتى فى المستقبل صحافية وحلم عمرى أوصل لجريدة الجمهورية
    لدرجة ان كان فيه ناس بتقولى حد يشتغل فى الجمهورية؟!
    دى جريدة منافقة.. مع انى شايفاها غير كدا
    هى يعنى لازم تشتم وتعارض عشان تبقى ميه ميه وتشيلوها على راسكم؟!!

    زى بالظبط مافيه ناس بتقولى حد يسمع التليفزيون المصرى دا كذاب
    طب ليه ؟ عشان مش بيسمح بالتجريح فى الرئيس
    وعشان مبيسمحش بتشويه صورة مصر امام العالم الخارجى
    قناة الجزيرة اللى بيحبوها دى
    حد عمره شافها بتقول حاجة عن بلدها قطر ؟؟
    طبعا لا .. هى تجرح فى كل البلاد
    وتشوه فى صورة مصر ادام العالم كله
    وعمرها ما بتتكلم عن بلدها

    بصراحة مش دا الموضوع اللى انا عايزة اتكلم فيه

    اللى عايزة رأيكم فيه هو سؤال

    هل يستحق الزعيم مبارك ان يخرج بهذا الشكل؟؟؟!!!

    قبل ماحد يجاوب على السؤال دا
    فكرو كويس بالعقل وبالمنطق بعديا عن اى صحف او قنوات

    - حسنى مبارك الأب الروحى لمصر العظيمة أعظم دولة فى العالم
    قبل ما يكون رئيس جمهوية كان ايه؟؟
    كان قائد القوات الجوية ونائب لوزير الدفاع وبعدها كان لواء ثم نائب رئيس الجمهوية محمد انور السادات

    وطبعا كلنا عارفين انه صاحب الضربة الجوية الاولى فى اسرائيل
    وعجبتنى اوى مقوله قالها السادات فى خطاب ليه
    قال فى اسرائيل بيحترمو مبارك جدا لان الضربة كانت موجعه

    الراجل ده كلنا عارفيش الظروف الصعبة اللى حكم فيها مصر بعد اغتيال السادات اللى هو فى نظرى احسن وافضل من جمال عبد الناصر واللى يعرف تاريخ كويس هيعرف الكلام دا

    المهم خلينا فى زعيمنا

    الراجل ده خدم مصر 30 سنه وكان ضحية حكومة فاسدة
    انا عارفة انه أخطأ بأنه لم يقيل هذه الحكومة من زمان
    بس محدش معصوم من الخطأ

    وحتى لو كان مخطئ فمميزاته بتطغى على عيوبه
    كفاية انه حمى مصر 30 سنه من الحروب وعمّرها
    واللى عاش ويلات الحرب هيعرف ويقدر الكلام دا

    - بعد 30 سنه من خدمةالوطن اتقال عليه عميل لامريكا واسرائيل
    طب ليه؟ عشان بيحميكم؟
    هو خيرا تعمل شرا تلقى !!!!
    ماهو لو عميل فعلا كان باع مصر من زمان ماهو عميل بقى ميهموش

    - بعد 30 سنه خدمة للوطن تقوم عليه ثورة بالشكل دا؟ جمعة الغضب وجمعة الرحيل وجمعة التحدى .. ليه كل دا؟
    عندكم مطالب وخرجتو ليها يبقى من حقه ينفذ مطالبكم ودا اللى حصل
    يوم جمعة الغضب 28 فبراير أقال كل الحكومة وعين وزراء ميتعيبوش
    حتى شفيق اللى كانتو بتطلبوه بالاسم عينه رئيس وزراء
    وخلى رئيس المخابرات نائب ليه
    وفى ظرف يومين الوزراء الجدد بدأو يشتغلو ويعملو حاجة
    الشرطة رجعت فى خدمة الشعب وبقى الظابط مكسوف يبص فى وشك
    يعنى بقى مذلول مش هو دا حقكم الضايع؟
    كمان نسبة البطالة اوشكت على المحو وكله كان هيشتغل
    والشعب فرح وكله نزل وقدم على الشغل
    حتى الاسعار رخصت والشعب بدأ ياكل رغم حدوث ازمات انتو عارفينها
    طلبو تغيير 3 مواد من الدستور غيرلهم 6 مواد
    وألغى قانون الطوارئ خالص مش عدله

    * اصبح دلوقتى نتيجة الثورة حدثت نقله كبيرة لمصر خلال ايام لم تحدث فى 30 سنه وانا اشهد

    * على الجانب الآخر السياحة انضربت وكل السياح رجعو بلادهم والفنادق اتقفلت والشباب اللى كانو شغالين فيها رجعو بيوتهم بل فيه منهم مرتباتهم ما اتصرفتش

    كمان فيه بعض التجار استغلو الازمة ورفعو اسعار بعض المنتجات
    لانه مفيش رقابة عليهم
    يعنى زى ماكان فيه مميزات للثورة كان فيه عيوب

    ** عاوزين مبارك يمشى؟؟ اهو مشى
    ايه الافادة بقى اللى عمت على الشعب؟
    بالعكس.. لو كان كمل فترة الرئاسة الكام شهر دول
    كان هيغير أكتر وأكتر

    للأسف الشديد احنا شبابنا انضحك عليهم
    جوم يكحلوها عموها
    اتعملهم غسيل مخ.. واللى هيج الشعب كدا مش مصريين (دخلاء)
    وكان الضحية شبابنا اللى ماتو شهداء
    واللى اغلبهم لم يتجاوز الثلاثين من عمره

    *- عايزة اقولكم ان انا من يومين حلمت حلم وحش اوى
    حلمت ان السماء بترمى علينا نار
    وكنت خايفه اوى من تفسير الحلم دا
    وأهو الحلم اتحقق وهتبدأ النار تنزل علينا
    وهنشوف حاجات مكناش منتظرين نشوفها

    ** اذا كان حسنى مبارك أخأ فيشفعله انه صلح خطأه
    يبقى ليه الثورة كانت مستمرة؟؟
    فين عقول الشباب اللى اتلعب بدماغتهم فين؟!!
    انا حزينة على مصر واللى حصلها واللى لسه هيحصلها

    * بعد تنحى الرئيس بلحظات الناس خرجت الشوارع تحتفل
    وكأنه نصر اكتوبر ميعرفوش اللى منتظرهم
    اذا كان مشى مبارك.. هييجى بداله ألف مبارك
    بس أسوأ
    - الناس خرجت بكلكسات زى بتاع الافراح وانا واقفة فى البلكونة بتفرج وببكى
    ببكى على حال الشعب المصرى اللى بدأ يقول الفاظ بذيئة
    كانت بتقطع فى قلبى وانا بسمعها
    زى( غمه وانزاحت - غار فى داهيه - أهو الزفت مشى.... وغيره كتير)

    طب ليه كل دا؟ هو فعلا يستاهل كدا ؟
    اللى حكم مصر 30 سنه وحمى ارضها يستاهل كدا؟

    انا ابويا لو غلط ورجع اعتذرلى وصلح غلطته مش هسامحه؟!!
    اكيد طبعا هسامحه لانه ابويا
    ايش حال دا بقى ابو كل المصريين

    دا غير انه رئيس جمهورية
    كفاية انه بطل من ابطال اكتوبر العظماء اللى احنا بنضربلهم تعظيم سلام
    ولا نسيتو؟؟؟؟!!!!!!!

    انا طبعا رغم حزنى على شهدائنا واللى مخلينى مش قادرة اغلط الشباب دول
    لان اللى ماتو بسبب شرطة فاسدة من اهلهم واصحابهم
    بس انا حقيقى فرحانة بشعب مصر
    بغض النظر عن كل دا
    لانه شعب صبور ومتماسك ومترابط
    ولما يكون عندنا شعب زى دا لازم نفرح بيه لانه شباب المستقبل
    محدش يفتكر انه كلامى متناقض .. لو ركزتو فى الكلام مش هتلاقو فيه اى تناقض


    انا جوايا احاسيس كتيرة
    انا حزينة على مبارك لانه ميستاهلش كدا ابدا
    وحزينة على الشهداء الضحايا لانهم برضو ميستاهلوش كدا
    وفرحانة بشعب مصر لانه شعب مترابط ومتماسك
    وخايفة على مصر من المستخبى والمجهول
    والله اعلم هيكون حلو ولا وحش
    وياترى هنفتخر بنفسنا بعد كدا؟..
    ولا هنندم عاللى احنا عملناه فى نفسنا؟؟

    انا طبعا اتمنى لمصر كل خير وتقدم
    حتى لو كان دا هيكلفنى حياتى.

    انا لو فضلت اتكلم مش هخلص
    بس انا عاوزة اقوله كلمة
    ***(مصر هتفتقدك اوى يا ريس وهتوحشنا اوى
    وشكــــــــرا على كل خدمة قدمتها لمصر
    سواء قبل الرئاسة او اثناءها
    وحقك عليا انا فى كل حد اهانك)***

    سؤالى بقى بعد كل الكلام والرغى دا
    هل فعلا الرئيس حسنى مبارك يستاهل يخرج بالشكل دا ؟؟؟؟؟؟؟؟؟

    منتظرة رأيكم واجابتكم واسفة جدا جدا على التطويل
    عارفة انى صدعتكم بس والله دا جزء بس من اللى جوايامش كله

    استودعكم الله
    وتحيا مصر
    BiG_BosS
    BiG_BosS
    Admin
    Admin


    عدد المساهمات : 1062
    تاريخ التسجيل : 22/10/2010
    العمر : 45
    الموقع : https://elreis.alafdal.net
    المزاج الان : مظبوط

    m10 رد: بصراحة مش لاقية عنوان

    مُساهمة من طرف BiG_BosS السبت 12 فبراير - 16:41




    أقسم بالله العظيم الراجل ده ما يستاهل منا كده

    أحنا يا جماعه اللى عملنا فى نفسنا كده ووصلناه لكده

    أنا معاكم أن الفتره الاخيره دى البلد خربت

    بس مش هوه السبب الناس ليه ساكته من زمان

    يمكن مع أول تغيير لو الشعب عارض كنتوا هتشوفوا رد فعله

    ولا أحنا فضلنا نراكم نراكم وفى الاخر فوقنا

    هوه كان شايف الشعب مش بيشتكى

    ومبسوط

    بالايميلات والفيس بوك وكمان المحمول

    محدش قال عايز حقى من الغلاء
    أو من الموصلات
    أومن العيش

    أو أو أو أو ـــــــــــ كتييييييييير اووووووووووى ياجماعه


    بس والله الراجل ده

    لو وأحد غيره كانت البلد خربت من زمان

    شوفو بقى الايام اللى جايه والله ربنا يستره على مصر

    وهنشوف بقى هتقدرو تعارضو ولا كل وأحد هيقعد

    على المصطبه ويقول الله يرحم زمن حســــنى مبارك


    أخوكم / الحزين على مصر
    الامير الرومانسى
    الامير الرومانسى
    صديق عزيز
    صديق عزيز


    عدد المساهمات : 49
    تاريخ التسجيل : 08/11/2010
    العمر : 32
    الموقع : https://elreis.alafdal.net
    المزاج الان : مشغول

    m10 رد: بصراحة مش لاقية عنوان

    مُساهمة من طرف الامير الرومانسى السبت 12 فبراير - 20:23

    بسم الله الرحمن الرحيم
    فى البدايه انا احب اهدنى نايت مون ع الموضوع الجميل


    انتى طرحتى عدة اسئله وعايزه الاجابه عنها بعقل ومنطق

    كل اللى قلتيه عن الريس كلام جميل
    بس ف بعض التعليقات على بعض من الكلام

    الراجل ده كلنا عارفين الظروف الصعبة اللى حكم فيها مصر بعد اغتيال السادات اللى هو فى نظرى احسن وافضل من جمال عبد الناصر واللى يعرف تاريخ كويس هيعرف الكلام دا

    المهم خلينا فى زعيمنا

    الراجل ده خدم مصر 30 سنه وكان ضحية حكومة فاسدة
    انا عارفة انه أخطأ بأنه لم يقيل هذه الحكومة من زمان
    بس محدش معصوم من الخطأ


    ضحية حكوم فاسده ازاى؟!!!
    اللى حصل فى انتخابات المجلسين (الشورى والشعب) من تزوير وكان ليا يد ف كدا وربنا اللى يسامحنى كان الكلام على يدى بس مكانش ينفع اتكلم عارفين ليه؟!! علشان كان فى حاجه اسمها امن الدوله يبقى فين العدل
    لما هو عايز يصلح فى البلد من 30 سنه !! ليه البطاله فى ازدياد من سنه 1980 !! فين خير البلد اللى ماحدش شاف منه حاجه!! فين قناة السويس ؟؟! فين مشروع توشكى ؟!المليارات! فين السياحه؟! فين البترول اللى كان بيصدره لإسرائيل بأقل السعار؟! ليه !هما كانو احسن مننا ولا ايه؟!ليه واحد زى احمد(زفت)عز اغتنى مره واحده ؟! ان شاء الله فى المواضيع الجايه هاتعرفوا من احمد عز وايه اساسه. ليه هوه من اغنى الناس فى العالم ؟! سبعين مليار فى البنوك الصغيره بس يبقى اللى فى سويسرا قد ايه؟! كل اللى كان يربى ذقنه يقول عليه ارهابى ليه؟! مش دا إساءه بالدين الاسلامى؟! اعطى فرصه للكلاب اليهود انهم يعملوا العمليات الارهابيه ويقولو جماعه مسلمين. طيب ليه مش دا دينك؟!
    بعد كل دا يبقى تقولى عليه ايه؟؟؟!!!!!!

    اااااااااه كنت نسيت اقولكم بالنسبه لتعديل القوانين
    ما اتعدلتش ليه حتى من 20 سنه؟!
    طيب انا هاقولكم حاجه حصلت وحقيقيه
    واحد قريبى هو من مركز ببا قرية منية الجيد مع انه مخلول شويه
    اتقدم للرئاسه فى التسعينات اعتقلوه واعتبروه مجنون وغير كده اعتقلوا 11 واحد من عائلته. طيب ليه؟!مش حرام!! مش دا استغلال!!



    دا غير انه رئيس جمهورية
    كفاية انه بطل من ابطال اكتوبر العظماء اللى احنا بنضربلهم تعظيم سلام
    ولا نسيتو؟؟؟؟!!!!!!!

    دا شئ يشرفنى
    بس على فكره مش هو لوحده اللى كان بطل . كل المصريين كانوا ابطال



    انا ابويا لو غلط ورجع اعتذرلى وصلح غلطته مش هسامحه؟!!
    اكيد طبعا هسامحه لانه ابويا
    ايش حال دا بقى ابو كل المصريين

    اوك معاكى فى الكلام
    بس الغلط مايستمرش 30 سنه ذل حرام!!!!!!!!!!


    شعب صبور ومتماسك ومترابط
    ولما يكون عندنا شعب زى دا لازم نفرح بيه لانه شباب المستقبل

    عندك حق كدا يغيروا فكرتهم عننا اللى وصلنا ليها
    اننا نقعد ع القهاوى وغير كده شباب.............



    بعد كل دا يبقى عايزانى انا ك شاب مصرى عشت فى ذل
    ناش عايشه معاها مليارات وهى مش معاها شهادات عليا علشان ان مجرد معاهم فلوس .. فلوس مين!! مليارات تبقى وزراء واعضاء مجلس شعب وشورى علشان الضرائب وعلشان..... وانا بدور على شغله بشهادتى وفى الاخر اسافر واتمرمط واتذل واغيب عن اهلى طيب ليه!! ليه وانا بلدى بلد الخير ومش لاقى فيها يبقى عايزانى اعمل ايه تانى ؟!!!!!!!!!!!!
    حرااااااااااااااااااااااااااااااااااااااااااااااااااام


    يبقى يخرج ازاى !!!!!!
    انا مش عارف ومش عايز احكم عليه دا مهما كان اب لينا وله منى تقدير وتحيه

    جزاك الله خيرا و thaERt
    night moon
    night moon
    مشرفه بالاداره
    مشرفه بالاداره


    عدد المساهمات : 149
    تاريخ التسجيل : 05/02/2011
    العمر : 32
    المزاج الان : صمت

    m10 رد: بصراحة مش لاقية عنوان

    مُساهمة من طرف night moon السبت 12 فبراير - 22:15


    انا اسفه يا امير
    بس انت مجاوبتنيش جواب ولا بالعقل ولا بالمنطق
    ارجع واعيد كلام أ/ محسن
    لما احنا حاسين بكدا من زمان
    ليه الاحتجاج مظهرش غير دلوقتى
    ماهو لو كان لقى اعتراض من الشعب من زمان
    اكيد كان هيغير وهيصلح الأمور
    لكن هو لقانا ساكتين وراضيين
    مجلسى الشعب والشورى كلنا كنا عارفين انها كلها تزوير
    ولو كانت حصلت الثورة دى ساعتها كانت اتحلت من زمان
    لكن مينفعش نسكت نسكت واول مانثور نقوله امشى
    ايه امشى وارحل .. طب هو احنا ضامنين اللى هييجى بعده هيعمل ايه
    احنا حتى معطينالوش فرصة يعمل أى تغيير
    مع انه لو كمل الكام شهر االباقيين دول
    فى ظل الثورة دى
    البلد دى كان هيتغير حالها 360 درجة
    ودا اكبر عيب فى الثورة..
    انها معطيتش فرصة لاى حد يعمل تغيير
    elpop
    elpop
    مجرم داونلود
    مجرم داونلود


    عدد المساهمات : 35
    تاريخ التسجيل : 22/10/2010
    الموقع : https://elreis.alafdal.net/
    المزاج الان : عدوانى

    m10 رد: بصراحة مش لاقية عنوان

    مُساهمة من طرف elpop الأحد 13 فبراير - 0:56

    اولا شكرا يانايت على موضوعك وانك فتحت باب النقاش
    سؤالك كان هو فعلا الرئيس مبارك يستحق يخرج بالشكل دا
    انا عن نفسى ومن رايى المتواضع كنت افضل انه يمشى فى الانتخابات المقبله
    اكراما للستين سنه اللى قضاهافى البلد دى
    بس الناس اللى فى ميدان التحرير برده عندهم حق لا نهم اتعودو على ان كله بيوعد وبس ودا حقهم طبعا وانا معاهم فى كدا برده مش ضده
    ورغم ان حسنى مبارك عمل انجازات كتير فهو ايضا عمل اخطاء كتير
    ورغم اخطائه ازدادت فى الفتره الاخيره لحد ما بقت حاجه وحشه الاانى برده كنت برجح انه يمشى فى نهايه مدته وان شاء الله ابقى اكمل كلامى فى وقت تانى علشان انا مش فاضى دلوقتى
    night moon
    night moon
    مشرفه بالاداره
    مشرفه بالاداره


    عدد المساهمات : 149
    تاريخ التسجيل : 05/02/2011
    العمر : 32
    المزاج الان : صمت

    m10 رد: بصراحة مش لاقية عنوان

    مُساهمة من طرف night moon الأحد 13 فبراير - 1:42

    طبعا مشغول فى الفيس بوك
    ماشى ياعم
    dowha
    dowha
    المشرف العام
    المشرف العام


    عدد المساهمات : 137
    تاريخ التسجيل : 09/11/2010
    العمر : 37
    المزاج الان : عادى

    m10 رد: بصراحة مش لاقية عنوان

    مُساهمة من طرف dowha الأحد 13 فبراير - 13:06

    على فكره انا ما قراتش كل المشاركات الا بعد ما كتبت مشاركتى عارفين ليه
    علشان انا واثق ان كلامكم كله صح حتى لو اختلفتوا مع بعض وحتى لو اعترضتوا او ايدتوا عارفين ليه علشان لازم يكون في اختلاف ولازم يكون فى عيوب ومميزات زى كل حاجه فى الكون حتى النظريات العلميه والرياضيه فيها عيوب ومميزات ودا مربط الفرس
    الرئيس ليه مميزات وعيوب وكذلك الثوره لها مميزات وعيوب
    عارفين اهم حاجه فى دا كله ايه النيه ازاى نوجهها وطبعا دى محلها القلب ما فيش حد يقدر يعرف اتجاهها الا صاحبها ابعاد النيه عن المصالح الشخصيه والاغراض الزائفه
    بس فيه ناس ما حسبتهاش صح للاسف يعنى انتخابات مجلس الشعب الاخيره كانت ممكن تمشى عاديه جدا من غير تزوير وكانت هتخدم الحزب برضوا وهتخدم الانتخابات الرئاسيه بس هما زودوها شويه والدليل ان فى ناس كتير حزب وطنى كانت بتنجح بنزاهه من غير تزوير امثال د / فتحى سرور _ محمد ابو العنين _ زكريا عزمى ) قصدى اقول ان لو الانتخابات مشيت عاديه ماحدش كان عارف كان ممكن الاغلبيه تبقى حزب وطنى وتخدم الانتخابات الرئاسيه القادمه كان فى ناس كتير ملايين من الاشخاص البسطاء كانوا هينتخبوا الرئيس او نجله بس هنقول ايه لو من الشيطان والمعارضه والثوره اكيد ماحسبوهاش صح فى امور كتير يعنى كانوا ممكن يعطوا للرئيس فرصه اخيره للاصلاح لانى كما ذكرت سابقا هو الوحيد اللى كان قادر على اجراء تصليحات عادله وتعديلات دستوريه مرضيه

    اخيرا قدر الله وماشاء فعل

    اما اجابة سؤال نايت فالكل يعرف اجابتى لايستحق الرئيس مبارك ان يخرج بهذه الصوره
    dowha
    dowha
    المشرف العام
    المشرف العام


    عدد المساهمات : 137
    تاريخ التسجيل : 09/11/2010
    العمر : 37
    المزاج الان : عادى

    m10 رد: بصراحة مش لاقية عنوان

    مُساهمة من طرف dowha الأحد 13 فبراير - 13:24

    انا دلوقتى قرأت الموضوع كله
    كلامك الاخير للريس يانايت ابكانى
    رجاء البوب اللون دا عمى عنيا
    الامير الرومانسى
    الامير الرومانسى
    صديق عزيز
    صديق عزيز


    عدد المساهمات : 49
    تاريخ التسجيل : 08/11/2010
    العمر : 32
    الموقع : https://elreis.alafdal.net
    المزاج الان : مشغول

    m10 رد: بصراحة مش لاقية عنوان

    مُساهمة من طرف الامير الرومانسى الإثنين 14 فبراير - 21:56

    انا اسف ان صدر منى رد فى غير موضعه
    بس معلهش اللى بيحصل واللى حصل كتييييييييير
    واللى عايز اقوله ان شاء الله فى الموضوع الاحق لى المره القادمه
    هاتعرفى انا عايز اقول ايه
    وإذا كان يستاهل او لا!!!!

      الوقت/التاريخ الآن هو الخميس 28 مارس - 18:21